سعادتي اهي عليكي حلال
يارب بحزني تتهني
خدي روحي مالوش لازمة
أعيش العمر مِتعنـّي

وانا يعني هاقولك ايه
ما انا ما باقولش غير حاضر
وانا راضي وانا مبسوط
ولو مقهور باقول حاضر

بتسقيني هموم وسموم
واقول تسلملي افعالك
وتهديني العقود بالشوك
وليه وجعي بيحلالك؟؟!!

أخدتيني وانا راضي
وعشمتي غشم عيني
وغرقتيني في وهمك
بقى ف جراحي عنواني

تعالي يا دنيا يا بايعة
ولو حابة هانتعاتب
ولو فيك شجاعتي بس
تعالي بينا نتحاسب

نشوف مين فينا متجني
ولو بالحق .. مين ظالم
ومين يستاهل الجنة
ومين هايموت بغاز عادم

أنا صابر لأني ضعيف
وضعفي ده أهم قرار
ولو قررت اكون زيك
انا قادر اكون جبار

لكني بصبري راح اقدر
يا افادي يا اغير الأحوال
وراح اكبر وراح اسعد
وراح اتغنى ف الموال

أنا الوحدة ونبضي جروح
ومين بيعيش بدون أحزان
راح أوصل يوم لروح الروح
ده انا عمري ما كنت جبان

انا هاصبر على حالي
وصبري ده جزاه مضمون
راح اسعد فيك او بعدين
ده وعد وقاله رب الكون