واللي افتكرته زمان سلام

اتاريه طلع معناه وداع

…ازاي يخون حلم السنين؟؟

ازاي يبيع ؟وبكام لمين؟؟

فاتت سنين

مستنياه من يوم ماراح

وكل ثانية بتتحفر فيّ الجراح

صوت الوجع عمال يزيد

حمل وخانقني تُقل الحديد

لما اللقا مش شيئ جميل

كان ليه ندوب والروح تميل

قلبي افتكر لحظة لقاه

كون هو تايه وانا طوق نجاه

كان ليه ناداني باحلى اسماء الدلع

حتى الكلام لا تقال لحد ولا اتسمع

كان ليه وليه..؟؟

مليون سؤال متحيرين

ومافيش سؤال مالهوش جواب

بس احنا خايفين ننطقه

خايفين نقول ان الهوى شرعه الخيانة

واللي يحب ليه المهانة..

ليه يتنسي ف وسط الطريق

ليه يتخنق ويموت غريق

غريق ف بحر دموع عينيه

ليه انه يكتب حرف جرحه برعشة ايديه

ليه ان دمعه يكتب اشواقه ف ورق

الحبر من عينه ف قلبه حرق الورق

ليه انه يتمادى ف شعوره بالوجع

وكمان يحس ان المحبة دي انهيار

ليه انه يستنى عطفك ليل نهار

وانت ناسي وانت فاكر ليه يحس بالانكسار

ليه الامل انه يشوف نظرة عينيك

ليه انه يبكي لو بقت ايده ف ايديك

وحاجات كتير ممنوعة عنه ونفسه فيها

فهمني قولي ده ليّ ليه؟؟

ماعدتش ابكي واستنى وعدك واسال عليه

أصل اللي كان فيّ خلاص وهم وخلص

ما عدتش اشكي من قلب احساسه خلص

ده انا من دموعي خلاص تعبت

حتى العتب ولا الملام مابقاش مهم

ما بقاش شاغلني نسيتني ليه؟؟

انا قلبي عندي فهبكي ليه؟؟

دور على ارض وصخور

لازم تكون الارض بور

علشان هتدفن فيها قلبك

انا ارضي خصبة بتطرح فرح

وانت بجفاك تطرح شرور

انا ارضي رافضة تحضن هواك

طردِت عينيك وحاوطت بسور

وبدم من جرحي القديم كتبت سطور

كتبت وداع ماهواش وداع

كتبت أسف كتبت بنور

إن لهواك ما بقاش وجود

ان الفؤاد ما بقاش جريح

اني فهمت الشوق صحيح

والحب لعبة..لعبة قصور

نبني ونرفع لكن كتير تطلع قشور

كان اللي كان وخلاص فهمت

ان الهوى أكبر غلط