ما بين وجع ساكن ضلوعي
وما بين سعادة بترسم

احلف اقول مافيش أسى
واحس همي بينعدم

لكن بافوق على وقعتي
والاقي ظهري بيتقطم

بين السكك حاير أنا..

لا في ايدين بتصدني
ولا في ملامح تبتسم

في سكة واعرة ف غربتي
وسكة سالكة بس مليانة بألم

فاجري اروح على غربتي
واحس حلمي بكل خطوة بينهدم

والاقي مفرق في الطريق
فاجري عليه وانا بابتسم

ألاقيه مودّي لبلاد عجيبة
فيها الخلايق ايــه.. اُمم

ولا فيها حد سامع ندايا
ولا حد شاف خط القلم

ولا حد عارف ايه منايا
ولا منه ليه أنا بانحرم

فيها وشوش كارهة المرايا
ووشوش بتنطق بالنعم

وبشر تخاف تحلم معايا
وبشر يعيشوا على بس حلم

وانا وسطهم تايه بخوفي ووحدتي
والقلب حاير لا هو ظالم ولا انظلم

لكن في حاجة متـّاخدة منـُّه
لا هو عربي ولا م العجم

ف بلاد عجيبة بادور أنا
واللي يشوفني يقول هرم

يقول علي حاجات غريبة
يقولها من باب العشم

يقولوا آل طيبة ملاك
ويقولوا آل طهر العلم

واقولّهم .. لا ده انا جبان
يقولوا أحسن .. من خاف سلم

كافي بقى حلو الكلام
يا بخت من بيّ رحم